詳細討論三更半夜个更字

【文／范文芳∕國立清華大學中國語文學系退休教授】

 

ㄧ、先來討論字形結構

　　1. 許慎《說文解字》，謂更，改也，從攴丙聲，字形結構係形聲字，有表意功能个部份，係攴，指打擊。用現代語言來解釋，係指用棍杖或皮鞭拍打小孩或牛羊馬等，用意為教導、改正其言行。許慎對改字之解釋，更也。更改兩字意通，可轉注。

　　2. 王延林《常用古文字字典》，對甲骨文字形之解讀，指手持鞭策，意近攴，對上半部丙未解釋，其見解同於許慎，傾向於將更字看成從攴丙聲个形聲字。

　　3. 谷衍奎《漢字源流字典》，對甲骨文字形之解讀，謂上半部丙，係指古時用五穀磨成之餅，手持長柄之餅鐺，伸入爐中烘烤，現代仍然援用此人工烘焙方式。此丙即餅，所以，更係會意字，丙兼表音，更係會意兼形聲，原意係指變更、更換。

　　

二、其次來討論字義个延伸

　　1. 最初之字義，比較像係動詞，如變更、更替、更改、更換、更生人。

　　2. 借做量詞，漢文化將夜晚值班分作五班，初更、二更、三更分別擔任暗時7、8點，9、10點，11、12點个守夜工作，更本係計時之量詞，三更半夜指夜暗11點到朝晨1點之間，確實係半夜。

　　3. 借做副詞，有更加、更為、更係、更好等用法。

　　4. 音同假借為經，文言文四字成語，少不經事，可寫少不更事。

　　

三、更字个客語字音比較複雜

　　1.根據《廣韻》，更有兩種反切，平聲係古行切，去聲係古孟切，都係梗攝見母字，台華語有兩音｛jing｝｛giing｝，台福語有兩音｛ging｝｛ginn｝。

　　2. 台客語因語意、語法不同，會有三音，三更半夜音｛gang｝陰平，係名詞借為量詞，土地變更音｛gen｝去聲，係動詞，更加好聽音｛gien｝上聲，係副詞。

　　3. 漢語音韻系統，台客語有一特色，古音曾、梗兩攝，今台華、台福都保留｛ing｝｛iing｝兩類韻尾，台客語都轉化為四種韻，為說解清楚，現舉字例說明，聰明｛min｝，明年｛mang｝/｛miang｝，清明｛miang｝，應該｛in｝應嘴｛en｝登山｛den｝冷泉｛lang｝，命令｛lin｝，零分｛lang｝。

　　4. 台客語【更】音為gen/gang，係合理个語音現象。

　　

四、從構詞造句个角度來討論三更半夜

　　1. 四字成語，係傳統古漢語非常慣用，同時係讀書人引以為傲个語文能力。

　　2. 裡句成語，三、半係數量，更、夜係計時之量詞，三更就係半夜。此種造句方式，係漢文化薰陶下个讀書人引以為傲个習俗，像一知半解、三番兩次、四平八穩、七零八落、九死一生、千方百計。

　　3. 客家鄉親有提出幾種無共樣个講法，其中半夜兩字較無爭議，前半兩字就有星光、生光、三光等講法。

　　4. 經過字形、字義、字音、構詞、句法个討論，三更半夜正係通俗又正確个講法。
　　
（海陸腔） 范文芳教授 聲檔 — 詳細討論三更半夜个更字





　

▲BACK